По осум бурни години во „жолто-виолетовиот“ дрес на Лејкерс, Леброн Џејмс го спроведе еден од најнеочекуваните потези во историјата на НБА-лигата. Намислувајќи го својот петти шампионски прстен, 41-годишниот суперстар потпиша двогодишна соработка вредна осум милиони долари со Филаделфија, со што „Севентисиксерс“ станаа негова четврта професионална станица по Кливленд, Мајами и Лос Анџелес.

Гостувајќи кај Стив Неш во подкастот „Mind the Game“, Леброн отворено прозборе за сите тајни мотиви што го одведоа во Пенсилванија, дестинација која воопшто не била во неговиот првичен план.

Првата искра ја запали младата ѕвезда Тајрис Макси, кој веднаш се претвори во офанзивен регрутер штом разбра дека Леброн си заминува од Калифорнија.

„Мојот однос со Тајрис Макси ги надминува границите на теренот. Едноставно сакам сè кај него. Секој ден е ист и кај него нема промени, а тоа е многу ретко во спортот, а очигледно уште поретко во животот. Секогаш сум зборувал за тоа каков човек е тој, а секако сите знаеме и што сѐ донесува на кошаркарскиот терен. Кога станав слободен агент и кога решивме да ги известиме Лејкерс дека нема да се вратам, тој беше еден од првите кои ме побараа на телефон.“

Летниот потпис на Џејлен Браун му даде дополнителна тежина на проектот во Филаделфија, но сепак, најголемиот кошаркарски мотив за Леброн лежи во ликот на Џоел Ембид. Досегашната кариера на Камерунецот е исполнета со индивидуални признанија, МВП-трофеи и олимписко злато освоено рамо до рамо со Џејмс во Париз, но „Сиксерс“ под негово водство никогаш не успеаја да го пробијат проклетството на второто коло од плејофот.

„Направи сè во нашата лига, а единственото нешто што сè уште го нема направено е да освои шампионска титула. Сакам да се обидам да му помогнам да стигне до својот прв прстен. На своите плеќи го носи целиот град. Тој е „Процесот“ веќе десет или 12 години, колку и да е таму. Мислам дека сега е вистинското време да заминеме уште подлабоко во процесот. Се надевам дека можам да бидам тој последен мал дел од слагалката кој ќе му помогне да ја прескокне таа пречка.“

Пред прагот на својата 42. година, кога речиси сите негови вршници одамна се во спортска пензија, „Кралот“ тргнува во последната голема авантура да ископира уште еден историски подвиг.

„Мислам дека сум уште повеќе вљубен во потрагата по одговорот на прашањето, уште колку долго можам да им пркосам на очекувањата и логиката.“