Португалската фудбалска јавност е во шок откако една од најголемите ѕвезди на националниот тим, Рафаел Леао, направи голем скандал на пријателскиот натпревар против Чиле што може скапо да го чини на претстојниот Мундијал. Офанзивецот на италијански Милан го загуби трпението во финишот на првото полувреме по еден остар старт на противнички фудбалер, по што влезе во жестока вербална пресметка со чилеанскиот дефанзивец Иван Роман, која брзо ескалираше во физички инцидент каде камерите јасно го уловија Португалецот како со удар го нокаутира својот ривал.

Главниот судија на мечот немаше никаква дилема и веднаш им покажа директни црвени картони на двајцата актери во инцидентот, испраќајќи ги предвреме во соблекувалната. Но, вистинскиот проблем за дваесет и шестгодишниот крилен напаѓач допрва доаѓа, бидејќи Дисциплинската комисија на ФИФА, поради сериозноста и насилничкото однесување, има целосно право да ја пренесе суспензијата и на официјалните мундијалски натпревари.

Доколку светската куќа на фудбалот одлучи да изрече минимална казна од еден меч, Леао ќе ја пропушти само последната контрола против Нигерија закажана за 10 јуни. Сепак, доколку дисциплинците му изречат поригорозна санкција, португалскиот ас дефинитивно ќе биде суспендиран и за големата премиера на Светското првенство против селекцијата на ДР Конго на 17 јуни, што би бил огромен удар за тактичките замисли на селекторот, па затоа сите со нетрпение го очекуваат конечниот збор на ФИФА кој треба да биде објавен во следните неколку денови.

Ivan Roman or Chile and Rafael Leao of Portugal both got red card for this 🤯! #PORCHI pic.twitter.com/OKTLsSdS4O

— The Final Whistle (@Rufus_45) June 6, 2026