Шпанската фудбалска репрезентација се соочува со огромни проблеми пред почетокот на планетарниот собир, откако стана јасно дека нивниот главен офанзивен адут, Ламин Јамал, најверојатно нема да биде подготвен за воведните натпревари. Како што пренесува угледниот медиум „The Athletic“, 18-годишниот суперталент на Барселона сè уште закрепнува од повредата на тетивата, поради што дефинитивно отпаѓа за премиерниот дуел од групната фаза против Зеленортските Острови на 15 јуни. Под голем знак прашалник е и неговиот настап за втората средба против Саудиска Арабија, закажана за 21 јуни.
Второпласираниот во трката за „Златната топка“ за 2025 година ја заработи оваа незгодна повреда минатиот месец за време на првенствениот меч против Селта, по што ја пропушти и самата завршница од клупската сезона со Барселона. Каталонскиот гигант и Шпанската фудбалска федерација (RFEF) се во постојан контакт и будно го следат неговиот процес на рехабилитација, кој се одвива според однапред утврден конзервативен план на лекување.
Зад Јамал е исцрпувачка сезона во која на 45 натпревари во сите конкуренции постигна 24 гола и запиша 16 асистенции, а желбата на медицинскиот тим е тој да биде максимално подготвен барем за последното коло од групата против Уругвај, кое се игра на 26 јуни во САД.
