Глобалната кошаркарска мапа е пред историска трансформација. Најсилната кошаркарска лига во светот, НБА, планира да лансира своја независна дивизија на Стариот континент под името НБА Европа. Според најавите на заменик-комесарот на НБА, Марк Татум, целта е да се формира лига со 16 екипи, чиј старт е проектиран за октомври 2027 година.

Она што е клучно во оваа фаза е одлучноста на челниците на НБА да го реализираат проектот по секоја цена. Како што пренесува агенцијата „Ројтерс“, Американците се подготвени да тргнат во реализација дури и доколку не постигнат договор за заедничко дејствување со актуелната Евролига.

Ултиматум или партнерство?

Во моментов, Евролигата ги обединува најголемите кошаркарски брендови на континентот, како што се Реал Мадрид, Барселона, Фенербахче и Олимпијакос. Сепак, за да си обезбедат трајно место во новиот елитен систем на НБА, овие клубови ќе мора сериозно да го одврзат ќесето. Информациите на Sports Business Journal говорат дека цената за постојан франшизен статус во НБА Европа се движи помеѓу 500 милиони и една милијарда долари, сума која досега ниту еден европски клуб не ја прифатил официјално.

„Нашите ставови се јасни и веќе ги пренесовме до Евролигата. Единствениот пат до сигурно и трајно место во новата лига е преку успешна апликација за постојан франшиза-статус“, дециден е Татум, кој најави нови состаноци со евролигашките претставници во претстојните седмици.

Иако НБА сака обединување на сите чинители во европскиот кошаркарски систем, Татум, јасно стави до знаење дека постои и „план Б“ кој вклучува соработка со ФИБА и надворешни инвеститори, доколку преговорите со Евролигата пропаднат.

Крајни рокови и „бомба“ од Рим: Лука Дончиќ влегува како газда

Процесот брзо се движи напред. Крајот на овој месец е означен како рок за финализирање на понудите, по што ќе започне фазата на евалуација и директни преговори со заинтересираните клубови за дебитантската сезона во 2027 година.

Зад сцената веќе се случуваат големи потреси на пазарот, а најзвучното име кое се поврзува со проектот е суперѕвездата на Далас Маверикс (и поранешен играч на Реал Мадрид), Лука Дончиќ. Словенечкиот ас одлучи да инвестира во сопствен франшизен тим кој би бил лоциран во Рим, вест која беше официјално потврдена и од раководството на НБА.

„Фантастично е што кошаркар од калибарот на Лука, кој самиот потекнува од европскиот систем, се враќа тука како инвеститор. Тој е максимално мотивиран за овој проект бидејќи од прва рака ја разбира потребата од нова структура која ќе донесе глобален профит и развој за кошарката во Европа“, заклучи Татум.