Вистински шок ги дочека навивачите на Споргинг Лисабон на стадионот „Жозе Алваладе“ во рамките од 7-то коло на португалската Примеира. Иако португалскиот гигант ја имаше победата во џеб со експресно водство од 2:0 за помалку од 20 минути игра, на крајот мораше да се задоволи со горчливи 2:2 против аутсајдерот Арука.

Домаќините тргнаа фуриозно уште од самиот почеток, капитенот Гонсало Инасио ја затресе мрежата уште во 3-тата минута, а колумбискиот напаѓач Луис Суарез во 17-тата минута ја удвои предноста за изгледни три бода. Меѓутоа, вториот дел донесе комплетна драма откако младиот белгиски бек Зено Дебаст во 54-тата минута заработи директен црвен картон и го остави својот тим на цедило со играч помалку.

Арука тотално ја искористи бројчаната предност и го притисна фаворитот во сопствениот шеснаесетник. Прво Хосе Фонтан од пенал во 81-вата минута ја намали негативата и внесе паника кај домаќините, за во 87-мата минута Уругваецот Дилан Надин со прецизен удар да го совлада Руи Силва и да донесе тотален молк на трибините. Овој неочекуван кикс доаѓа како вистински студен туш за лисабонските „лавови“ во пресрет на големото дерби меѓу Порто и Бенфика.