Со првиот судиски свиреж на Светското првенство во Северна Америка започнува и немилосрдната војна меѓу спортските директори на најголемите европски клубови. Сите тие со нетрпение ги очекуваат настапите на младите таленти, но се свесни дека нивната цена може драстучно да скокне по само еден одличен настап на Мундијалот.
Издвојуваме неколку млади талентирани играчи кои зад себе имаат одлични сезони во клубовите, а може да блеснат и на Мундијалот.
Новиот аргентински бисер Нико Паз
По фантастичната сезона во италијанскиот Комо, младиот плејмејкер е подготвен да ја преземе офанзивата на Аргентина во моментите кога ќе се добие шанса. Реал Мадрид будно ја следи неговата ситуација и планира експресно да ја активира повратната клаузула пред другите клубови да испратат понуди.
Еквадорскиот дијамант Кендри Паез
Младиот фудбалер е во сопственост на Челси, а неговите одлични игри на позајмица во Ривер Плата веќе ги запалија алармите на „Стамфорд Бриџ“. Лондонци со нетрпение сакаат да го видат во тандем со Каиседо, но постои опција и за негова астрономска препродажба на некој европски ривал доколку блесне во Америка.
Крстосницата на бразилското чудо Ендрик
Овој 19-годишен напаѓач ја врати својата препознатлива голгетерска форма на позајмица во Лион по тешкиот период и силната конкуренција во Мадрид. Настапот за Бразил на Мундијалот ќе биде клучниот тест кој може да му донесе на младиот Ендрик трансфер во некој од најдобрите клубови во Европа.
Физичката моќ на Јан Диоманде
Со 13 гола и 10 асистенции во Бундеслигата за Лајпциг, овој претставник на Брегот на Слоновата Коска е главна мета на скаутите на Манчестер Јунајтед и Ливерпул. Германскиот клуб е познат како одличен трговец и веќе му одреди висока почетна цена која дополнително ќе порасне со секој добар мундијалски меч.
Турскиот виртуоз Кенан Јилдиз
Бисерот на Јувентус ќе го предводи нападот на храбрата Турција, а неговата фантастична контрола на топката во тесен простор веќе привлече сериозен интерес кај Арсенал и ПСЖ. Официјалните понуди од овие гиганти се очекуваат веднаш штом заврши мундијалската авантура за турската селекција.
Младите адути на ПСЖ во таборот на Франција
Бредли Баркола и Ворен Заир-Емери ќе бараат свое стандардно место во силниот состав на „триколорите“ на овој шампионат. Иако клубот од Париз ги смета за недопирливи, богатите премиерлигаши сигурно ќе се обидат да ги примамат со огромни финансиски понуди.