Водечкиот во генералниот пласман во Формула 1, Кими Антонели, ќе се соочи со сериозен хендикеп на домашната патека за Големата награда на Италија, откако Мерцедес одлучи целосно да му ја замени погонската единица. Ова значи дека младиот Италијанец ќе стартува од последното место на решетката во Монца, без разлика каков резултат ќе оствари во квалификациите.

Германскиот тим ги искористи сите четири дозволени погонски единици за оваа сезона, па проценката беше дека легендарната италијанска патека, поради можностите за полесно претекнување, е најоптималното место за одлежување на казната. Првиот човек на тимот, Тото Волф, истакна дека одлуката е донесена исклучиво водена од пресметките за генералниот пласман, а не од емоции поради домашната трка. Во исто време, слична казна за промена на мотор во следниот период го очекува и неговиот тимски колега Џорџ Расел.

Антонели во моментов ја предводи табелата со 242 бода, пред Расел и Луис Хамилтон кои имаат по 183. Тркачкиот викенд за Големата награда на Италија во Монца е на програмата од 4 до 6 септември.