Италијанскиот офанзивец Федерико Киеза јавно ја изрази својата желба за враќање во Серија А по разочарувачката сезона помината во тимот на Ливерпул.

Киеза зад себе има тешка година на „Енфилд“ во која воопшто не се наигра. Тој забележа скромни 318 минути во Премиер лигата, односно вкупно 726 минути во сите натпреварувања. Иако неговиот договор со англискиот гигант е со важност на уште две години, малата минутажа од почетокот на 2026 година го принудува да бара излез. Фудбалерот откри дека во јануарскиот преоден рок тогашниот менаџер Слот не му дозволил трансфер поради краткиот ротациски состав. Сепак, по претстојните подготовки во САД, тој планира сериозен разговор за својата иднина со новиот предводник на Ливерпул, Андони Ираола.

Во интервју за италијанските медиуми, тој го појасни своето заминување од Торино и ги демантираше гласините дека барал преголема плата. Киеза откри дека Кристијан Џунтоли и Тиаго Мота директно му соопштиле дека не им е потребен, без воопшто да му понудат каква било опција за продолжување на соработката. Тој нагласи дека Јувентус секогаш ќе има посебно место во неговото срце, но истовремено порача дека е отворен и за други предизвици каде што би имал континуитет на теренот. Како интересна опција во Италија ја издвои екипата на Комо, фалејќи ја работата на нивниот стратег Сеск Фабрегас.