Уругвајскиот голгетер Единсон Кавани повеќе не е фудбалер на Бока Јуниорс. Искусниот напаѓач и аргентинскиот гигант постигнаа договор за предвремен раскин на соработката, откако новиот тренер не го вклучи во своите планови за претстојната сезона.

Кавани ја завршува својата епизода во клубот по речиси три години, период во кој настапи на 81 натпревар, постигна 28 голови и запиша три асистенции. Иако во одредени моменти беше еден од лидерите на тимот, неговите последни шест месеци во Бока беа обележани со ограничена минутажа и чести проблеми со повреди, кои го спречија да придонесе во посакуваната мера.

Популарниот „Ел Матадор“ пристигна во Бока Јуниорс како големо засилување и омилен меѓу навивачите, носејќи со себе огромно искуство стекнато во европските гиганти како Манчестер Јунајтед, ПСЖ и Наполи. И покрај тоа што не успеа целосно да ги исполни високите очекувања, неговото име ќе остане запишано во поновата историја на клубот.

Засега не е познато каде Кавани ќе ја продолжи кариерата, но на 39-годишна возраст искусниот голгетер сè уште не размислува за пензија и се очекува наскоро да ја донесе одлуката за својата следна дестинација.