Карлос Алкараз веќе речиси три месеци е целосно надвор од тениските терени. Неговото отсуство сериозно се чувствува на турнејата, особено на тековниот Вимблдон, но најновите информации од неговиот табор воопшто не донесоа оптимизам. Вториот рекет на планетата се соочува со реална опасност да го пропушти и претстојниот УС Опен, кој е последен гренд слем во сезоната.

Популарниот „Карлито“ е во аут уште од април, кога заработи незгодна повреда на зглобот на раката за време на настапот во Барселона. Се чини дека тежината на повредата е многу поголема отколку што првично се мислеше, па тимот на Шпанецот сега нема многу простор за калкулации. До почетокот на Отвореното првенство на САД остануваат уште само осум недели, што го става младиот тенисер во брутална трка со времето. Неодамна се појавија снимки на кои тој тренира со намален интензитет, но неговиот настап на Мастерсите во Канада и Синсинати, кои требаше да бидат главен тест за неговата кондиција, сега висат во воздух.

Самиот Алкараз неодамна зборуваше за овој тежок депресивен период, нагласувајќи дека сè се случува со причина и дека оваа пауза ја сфаќа како дел од неговата спортска судбина. Тој потенцираше дека во овие моменти најмногу му помага поддршката од семејството, кое никогаш не му создавало притисок и му дозволило максимално да ужива во тенисот.

Од неговиот медицински тим сè уште нема официјална потврда за точната природа на повредата, што е класична тактика на Шпанецот со цел неговите најголеми ривали да не ги дознаат неговите моментални физички слабости.