Менаџерот на Манчестер Јунајтед, Мајкл Карик, не го криеше разочарувањето по поразот од Атлетико Мадрид во Лигата на шампионите, истакнувајќи дека неговиот тим мораше да извлече многу повеќе од овој дуел. Со овој нов неуспех, англискиот гигант влезе во загрижувачка серија од пет последователни натпревари без победа во сите натпреварувања.

Натпреварот започна со експресен шок за гостите кои примија гол уште во 53. секунда, а во вториот дел останаа и со десетмина на теренот по исклучувањето на Лени Јоро, одлука за која Карик смета дека е погрешна.

„Впечатоците ми се изменети. Ова е тешко гостување, а почетокот што го имавме очигледно нè доведе во тешка ситуација. Мислам дека подоцна фативме ритам и влеговме во мечот. Во второто полувреме воспоставивме одредена контрола, иако не бевме сериозна закана. Потоа следеше шансата на Бруно, па црвениот картон, за кој сметам дека беше лоша одлука. Навистина сум разочаран што немавме повеќе шанси“, изјави Карик.

Англискиот стратег исто така додаде дека тимот пробал одредени тактички корекции во одбраната, но горчината од испуштената можност останува:

„Се обидовме со нешто малку поинакво. Во дефанзивата веројатно премногу ја менувавме страната на играта. Најважно е што чувствуваме дека резултатот ни беше на дофат, можевме и моравме да извлечеме повеќе од овој натпревар. Иако некои работи ги правиме како што треба, мора подобро“, додаде предводникот на „црвените ѓаволи“.

Шанса за прекинување на негативната серија Манчестер Јунајтед ќе има веќе во недела, кога гостува кај Лидс во рамките од 7. коло во Премиер лигата.