Новата кошаркарска сезона носи нова трка за трофеи, а МЗТ Скопје Аеродром повторно влегува со највисоки амбиции на домашната сцена. „Штрковите“ не сакаат да се задоволат само со продолжување на доминацијата во Македонија, туку најавуваат и сериозен настап на меѓународен план. Во пресрет на почетокот на сезоната, капитенот Дамјан Стојановски ги сподели очекувањата од новиот предизвик и потврди дека целите на скопскиот тим остануваат добро познати – борба за сите достапни трофеи.

„Амбициите на МЗТ Скопје Аеродром се секогаш исти – највисоки. Како и секоја година, така и оваа целите се највисоки и во домашното првенство и во АБА2 лигата, а дополнително сакаме да оствариме што подобар пласман и во ФИБА Еврокупот“, изјави Стојановски.

Искусниот капитен посочи дека патот до поставените цели ќе мора да се гради преку заедничка игра и максимална енергија на секој натпревар. Според него, токму колективниот пристап може да биде една од најважните предности на МЗТ во сезоната која следува.

„Најголемото наше оружје во сезоната што е пред нас ќе бидат тимската игра и енергијата. Верувам дека токму тие сегменти ќе ни помогнат да ги оствариме поставените цели“, додаде капитенот на МЗТ.

Стојановски доби и прашање што очекува од новата сезона во македонската Суперлига, а неговиот одговор беше краток, но доволно јасен за да предизвика насмевка.

„Од новата сезона во Суперлигата очекувам да играме во топли сали“, порача низ насмевка Стојановски.