Искусниот англиски стопер Џон Стоунс во моментов е најатрактивното слободно име на фудбалскиот пазар. Иако вниманието на јавноста е главно насочено кон иднината на Мохамед Салах и Душан Влаховиќ, Стоунс е тој што зад кулисите собра речиси двоцифрен број на заинтересирани клубови. Последен во низата гиганти што се вклучи во оваа трка е италијанскиот Јувентус.

Италијанските медиуми пренесуваат дека „старата дама“ веќе се распрашува за дефанзивецот, иако официјални преговори сè уште нема. Самиот фудбалер веќе изрази желба да кариерата да ја продолжи во Серија А, па неговите агенти претходно го понудија на неколку силни клубови на Апенините. Главна пречка во разговорите во моментов се неговите високи финансиски барања. Стоунс ќе мора да прифати значително помала плата од оние 15 милиони евра годишно што ги заработуваше во Манчестер Сити за овој трансфер да стане реалност. Во меѓувреме, тој му беше понуден и на Интер, но раководството на „нероазурите“ експресно ја одби опцијата.

Интересот на Јувентус за Англичанецот лесно може да најави заминување на Бразилецот Бремер од Торино. Неговата откупна клаузула изнесува 54 милиони евра за итна исплата, односно 60 милиони евра доколку се плаќа на рати, а најсериозен кандидат за неговиот потпис е Баерн Минхен. Интересно е што токму Баварците се исто така во игра и за самиот Стоунс. Германскиот тим тука игра на картата на менаџерот Венсан Компани, кој со години играше заедно со Стоунс во одбраната на Манчестер Сити и со кого негува блиско пријателство. Покрај овие тимови, за Стоунс интерес покажаа уште и Евертон и Ковентри.

Најголем знак прашалник околу ангажманот на искусниот дефанзивец се неговите чести повреди. Во последните две сезони тој одигра само 20 натпревари за Манчестер Сити поради постојани проблеми со задната ложа, препоните и стопалото. Сепак, фудбалер кој во својата кариера има освоено дури 17 трофеи ретко се наоѓа на пазарот без обесштетување, па затоа европските клубови се подготвени да ризикуваат со неговиот ангажман.