Германските репрезентативци доживеаја мал шок на самиот старт од новата ера, откако Јирген Клоп реши радикално да ги искорени сите комодитети кои беа заштитен знак во мандатот на Јулијан Нагелсман. Инспириран од сличните дисциплински потези што ги повлече Зинедин Зидан во Франција, новиот селектор на Германија стави јасна граница меѓу професионализмот и индивидуалниот луксуз.

Најголемата промена која веднаш го привлече вниманието на германските медиуми е комплетниот бојкот на личните фризери во репрезентативниот камп. Пораката на Клоп е повеќе од јасна, стилизирањето и разгалувањето завршуваат пред влезот во базата, а за време на собирот постои простор исклучиво за фудбал.

Промената во филозофијата директно се пресликува и во ресторанската сала. Наместо досегашната пракса каде што играчите доаѓаа на вечера во термини кои самите ги избираа, сега целата експедиција мора во исто време да седне на маса. Со овој потег Клоп сака да ги натера фудбалерите да комуницираат, да градат тимски дух и да го заборават дигиталниот свет. Во иста насока е и строгото ограничување на мобилните телефони, кои мора да бидат исклучени за време на масажите и подготвителните активности на самиот ден на мечот.

Затегнувањето на ремените нема да застане тука. Стратегот веќе подготвува нов протокол за Европското првенство 2028 година во Велика Британија и Ирска, каде што планира драстично да ги скрати посетите од сопругите и семејствата. По претходните критики во јавноста дека репрезентативниот камп повеќе наликува на луксузен ресорт за одмор отколку на база за освојување трофеи, Клоп реши дефинитивно да стави крај на тие навики.