Само еден ден откако Њујорк Никс официјално се закитија со шампионската титула во НБА лигата, пазарот за размена на играчи експлодираше, а во центарот на глобалното внимание очекувано се најде Јанис Адетокумбо. Иако во текот на викендот одекна веста дека Бостон Селтикс испратиле официјална понуда за грчкиот суперстар, а Минесота демне од сенка, желбата на „Грик Фрик“ е повеќе од јасна, тој сака да се пресели исклучиво на Флорида. Добро упатениот инсајдер на ЕСПН, Брајан Виндхорст, откри дека преговорите зад кулисите траат со месеци, но дека во последните десетина дена драстично се интензивирале и дека целата лига е убедена во конечна реализација на овој спектакуларен трансфер.

Бидејќи Адетокумбо влегува во последната година од својот договор, тој има огромна контрола над својата судбина, па затоа челниците на Милвоки се притиснати до ѕид. Првичната понуда на Мајами не ги задоволуваше вкусовите на Бакс, но во приказната сега се вклучени уште два тима кои треба да помогнат во тристрана или четиристрана размена за да се задоволат апетитите на поранешниот шампион. Угледниот медиум „Ди Атлетик“ веќе го објави бруталниот пакет кој Хит го стави на маса, а тој ги вклучува Тајлер Хиро, Келел Вер, Хаиме Хакез Џуниор, како и еден од младите кошаркари Пеле Ларсон или Каспарас Јакучионис. Покрај кошаркарите, Мајами е подготвен да испрати и дури пет пикови од првата рунда на претстојните драфтови.

Раководството на Милвоки Бакс инсистира на комплетен расплет на целата драма најдоцна до крајот на оваа недела. Нивната намера е да влезат на претстојниот НБА драфт со потполно чиста ситуација и дефиниран буџет, со цел веднаш да почнат да го градат тимот за новата ера по заминувањето на Адетокумбо.