Веднаш по официјализацијата на големиот трејд со кој Јанис Адетокумбо стана нов кошаркар на Мајами Хит, во клубот настана вистинска збрка поради еден наизглед ситен детал. Навивачите веднаш побрзаа да ги купат дресовите на грчката суперѕвезда со препознатливиот број 34, но брзо се испостави дека еден од најдобрите играчи на светот во новата средина сепак ќе го носи бројот 7.

Мајами веднаш по потврдата на размената го пушти во продажба дресот на Адетокумбо со бројот 34 во официјалните фан-продавници и преку интернет. Меѓутоа, само неколку часа подоцна, Јанис за време на едно вклучување во живо на социјалните мрежи наговести дека планира промена на бројот. Ова предизвика лавина од коментари меѓу навивачите, кои веднаш сфатија дека првите купени дресови во тој момент станаа вистински колекционерски примероци.

Набрзо пристигна и официјалната потврда од Флорида дека Јанис Адетокумбо во Хит ќе ја носи „седумката“. Од клубот соопштија дека сите навивачи кои направиле онлајн нарачка со бројот 34 автоматски ќе ја добијат новата верзија со бројот 7, додека оние кои веќе го купиле дресот во продавниците ќе имаат можност да направат замена. И покрај тоа, голем дел од фановите размислуваат да не ја искористат оваа опција, бидејќи дресот со бројот 34 беше во продажба само неколку часа и неговата вредност кај колекционерите веќе расте.

Со овој потег, Адетокумбо ќе стане 14-тиот играч во историјата на Мајами Хит кој ќе го носи бројот 7. Пред него, овој број го носеа Рекс Чепмен, Пени Хардавеј, Шон Мерион, Џермејн О’Нил, Кајл Лаури и младиот Келел Вер, кој пак како дел од истиот трејд за Јанис заврши во Милвоки Бакс.

Што се однесува до остатокот од играчкиот кадар, по доаѓањето на Адетокумбо, Мајами се збогуваше со Норман Пауел. Него на теренот практично ќе го замени досегашен кошаркар на Денвер Нагетс, но тука сигурно нема да заврши тргувањето на Хит ова лето, со оглед на тоа што раководството сè уште потајно се надева и на потписот на Леброн Џејмс.