Андреј Јакимовски продолжува да го остава својот печат во дресот на Наполи. Македонскиот репрезентативец одлично ја започна новата сезона и уште еднаш покажа дека во новата средина може да има значајна улога. По вториот натпревар, неговите бројки веќе сериозно го привлекуваат вниманието.

Наполи стигна до втора победа во исто толку натпревари, совладувајќи ја Реџо Емилија со 99-93 во интересен и неизвесен натпревар. Гостите имаа одличен старт и по првата четвртина водеа со 34-23, но домаќините не дозволија натпреварот да им избега од контрола. Наполи брзо се врати во игра и на полувремето имаше минимална предност.

До самиот финиш се водеше голема борба, а „наполитанците“ го скршија отпорот на противникот во клучните моменти. Слободните фрлања одиграа важна улога во завршницата, а две од нив реализираше токму Јакимовски. Македонецот повторно беше меѓу најдобрите на паркетот. За 28 минути постигна 17 поени и собра 10 скокови, стигнувајќи до нов дабл-дабл и потврдувајќи ја одличната форма на почетокот од сезоната.

Јакимовски летово пристигна во Наполи од Тренто, а по првите две средби јасно е дека новиот клуб сериозно смета на неговиот придонес. Наполи има максимален ефект од две победи, а македонскиот кошаркар веќе се наметнува како една од важните алки во тимот.