Иван Ракитиќ не штедеше зборови во својата последна критика кон модерната технологија, истакнувајќи дека ВАР системот полека го убива она што го прави фудбалот магичен – емоцијата. Искусниот хрватски интернационалец смета дека инсистирањето на совршенство е погрешно, бидејќи грешките на играчите и судиите се составен дел од спортскиот дух.
„Не го сакам ВАР, бидејќи ја обожавам спонтаноста во фудбалот. Судиите, исто како и фудбалерите, имаат право на грешка и тоа мора да го прифатиме“, дециден е поранешниот ас на Барселона.
За Ракитиќ, чекањето пред екраните е неприфатливо за динамиката на најважната споредна работа во светот, правејќи јасна разлика со другите спортови.
„Фудбалот не е кошарка, не може да чекате три минути за да дознаете дали смеете да се радувате на гол“, објаснува тој, додавајќи дека технологијата на гол-линијата и ВАР суштински го менуваат карактерот на играта.
На крајот, тој заклучува дека потрагата по математичка прецизност му одзема на фудбалот голем дел од неговата душа и непредвидливост.
