Колумбија успешно го отвори настапот на Светското првенство, совладувајќи го Узбекистан со 3-1 во натпревар од групата К одигран на легендарниот стадион „Ацтека“ во Мексико Сити. Најзаслужен за триумфот беше Луис Диаз, кој уште еднаш покажа зошто е најголемата ѕвезда на колумбиската селекција. Напаѓачот постигна гол и запиша асистенција, предводејќи ја својата репрезентација до важни три бода на стартот од турнирот.

Иако важеше за фаворит, Колумбија не дојде лесно до победата. Узбекистан одигра храбро и организирано, оставајќи одличен впечаток на своето мундијалско деби. По неколку неуспешни обиди, јужноамериканската селекција поведе во 41. минута кога Диаз одлично го пронајде Даниел Муњоз, кој рутински реализираше за 1-0. Азиската селекција возврати во 65. минута и испиша историја. По одбранет удар на Шомуродов, најснаодлив беше Абосбек Фајзулаев, кој го постигна првиот гол на Узбекистан на светските првенства и донесе израмнување.

Сепак, радоста на дебитантот беше краткотрајна. Само пет минути подоцна, Колумбија организираше брз напад, а Луис Диаз прецизно ја заврши акцијата за ново водство. Во судиското продолжение Хамилтон Кампаз стави точка на натпреварот и ги постави конечните 3-1. Во следното коло Колумбија ќе игра против ДР Конго, додека Узбекистан ќе бара први бодови во дуелот со Португалија.