Фудбалот уште еднаш се најде во теснец меѓу спортската еуфорија и длабоките дипломатски кризи кои го тресат Блискиот Исток и Западот. Додека светот се подготвува за најголемиот спортски настан, политичките препукувања меѓу Техеран и Вашингтон се преселија директно на зелениот терен, ставајќи го под знак прашалник учеството на една од најсилните азиски репрезентации. Наместо за тактики и голови, сега најмногу се зборува за безбедносни протоколи и државно достоинство во пресрет на турнирот во Северна Америка.
Иранскиот фудбалски сојуз постави строги услови до ФИФА, нагласувајќи дека нивното гостување на претстојното Светско првенство зависи исклучиво од добивањето на цврсти гаранции за безбедност и политичка неутралност. Мехди Таџ, првиот човек на иранскиот фудбал, отворено побара од Џани Инфантино и неговите соработници да овозможат амбиент во кој делегацијата ќе биде заштитена од навреди и инциденти кои биле карактеристични за нивните претходни меѓународни настапи.
Клучниот услов на Техеран е „апсолутно почитување“ на државните и воените симболи на земјата. Таџ беше дециден дека каков било обид за омаловажување на иранските институции ќе предизвика радикален одговор. Доколку домаќините дозволат провокации или навреди насочени кон официјален Иран, репрезентацијата е подготвена веднаш да го прекине натпреварувањето и демонстративно да се врати дома.
Целата ситуација е дополнително комплицирана од лошите дипломатски односи меѓу Иран и Соединетите Американски Држави, како еден од главните домаќини на турнирот. По неодамнешните непријатни настани во Канада, иранската страна не сака ништо да остави на случајноста. Иако ФИФА засега се држи до вообичаените протоколи, јасно е дека спортската дипломатија ќе мора да работи со полна пареа за да се избегне голем скандал кој би го фрлил во сенка најважниот фудбалски настан на планетата.
