Натпреварот меѓу Франција и Мароко на Светското првенство доби несакано продолжение на улиците на Лондон, каде што по последниот судиски свиреж избувнаа инциденти меѓу навивачи и полицијата. Според информациите од британските власти, група навивачи ја блокирала сообраќајницата „Еџвер Роуд“, по што ситуацијата брзо излегла од контрола. Кон полицајците биле фрлани шишиња и пиротехнички средства, што довело до интервенција на дополнителни полициски сили.

Во немирите бил повреден еден полицаец, кој со повреда на главата бил пренесен во болница, а четири лица биле приведени под сомнение за хулиганство и насилно однесување. Од локалните власти остро ги осудија инцидентите и упатија апел до навивачите да покажат спортски дух и почит за време на Светското првенство. Воедно, беше посочено дека ваквите немири не се изолиран случај, бидејќи британските безбедносни служби во последните денови регистрирале повеќе инциденти поврзани со мундијалските натпревари.