Контроверзното судиско решение на натпреварот меѓу Португалија и Хрватска предизвика бурни реакции, а меѓу најгласните критичари беа фудбалските легенди Тиери Анри и Златан Ибрахимовиќ. Анри смета дека поништениот погодок на Хрватска никогаш не требало да биде поништен, истакнувајќи дека ВАР не смее да интервенира кога нема јасен и недвосмислен доказ. Според Французинот, долгото разгледување на снимките само покажува дека ситуацијата не била доволно чиста за да се смени првичната одлука на теренот.

Уште поостар беше Ибрахимовиќ, кој директно ги обвини судиите дека носат одлуки кои, според него, одат во прилог на Португалија и Кристијано Роналдо. Швеѓанецот оцени дека фудбалот ја губи својата природна динамика поради претераното анализирање на минимални детали преку ВАР. Изјавите на двајцата поранешни асови веднаш предизвикаа големо внимание во фудбалската јавност и дополнително ја разгореа дебатата околу употребата на видео-технологијата на Светското првенство.