Лина Ѓорческа го заврши настапот во квалификациите за УС Опен уште во првото коло, откако македонската тенисерка загуби од Јапонката Маи Хонтама со 2-0 во сетови (7-6, 6-3).

Ѓорческа имаше свои моменти во мечот, особено во првиот сет, но не успеа да ја искористи добрата игра за да стигне до водство. Хонтама рано направи брејк и поведе со 2-0, по што Лина возврати, но повторно го загуби својот сервис. Јапонката стигна до 4-2, но до крајот на сетот двете тенисерки неколкупати си го одземаа сервисот, па победникот мораше да се решава во тај-брејк.

Во одлучувачката игра Хонтама беше убедлива и со 7-1 го освои првиот сет, со што направи важен чекор кон победата.

Во вториот сет Ѓорческа долго време беше рамноправна. Македонката успеа да одржи резултатска рамнотежа до 3-3, но потоа следеше пад во нејзината игра. Хонтама направи брејк за 4-3, потоа сигурно го потврди на свој сервис и поведе со 5-3, а мечот го затвори со нов брејк.

Со тоа Ѓорческа остана без пласман во главниот турнир на последниот Грен слем во сезоната, додека Хонтама продолжува во квалификациите за УС Опен.