Репрезентацијата на Холандија го запиша вториот триумф во елитната А-дивизија од Лигата на нации, откако на домашен терен во Ајндховен го совлада тимот на Србија со 2-1. Иако гостите покажаа значително подобра игра во споредба со претходните мечеви, сепак Холанѓаните во клучните моменти го искористија своето искуство и со погодокот на Џошуа Зиркзе стигнаа до важни три бода во трката за првото место во групата.

Домаќините го отворија мечот со диктирање на ритамот и поголем посед на топката, а иницијативата ја наплатија во 31. минута. Теун Копмајнерс изведе лукав слободен удар од работ на шеснаесетникот и низ гужвата го изненади српскиот голман Вања Милинковиќ-Савиќ за 1-0. Сепак, српскиот состав реагираше експресно, само четири минути подоцна, 19-годишниот напаѓач Михајло Цветковиќ одлично реагираше на центаршутот на Терзиќ и со прецизен удар со глава го израмни резултатот.

Во почетните минути од второто полувреме, Србија пропушти неколку сериозни шанси за целосен пресврт, пред сè преку расположениот Цветковиќ. Сепак, откако српскиот селектор Вељко Пауновиќ изврши неколку измени во средниот ред, Холанѓаните повторно ги презедоа сите конци во свои раце и го засилија притисокот.

Клучниот момент се случи во 72. минута, по брза и прецизна комбинација меѓу Рејндерс и Дaмфрис, топката стигна до Зиркзе, кому од непосредна близина не му беше тешко да ја смести во празната мрежа за конечни 2-1.

Со оваа победа, Холандија стигна до осум бода и се израмни на врвот од табелата со репрезентацијата на Грција, додека Србија и по четири одиграни кола останува на дното од групата без освоен бод.