Холандија и Германија вечерва ќе го обноват едно од најголемите европски фудбалски ривалства, но овојпат нивниот меѓусебен дуел ќе има дополнителна тежина. Двете репрезентации влегуваат во нова ера со нови селектори, па големото дерби ќе биде и прв сериозен тест за нивните амбиции. Натпреварот е закажан за 20:45 часот, а во центарот на вниманието ќе бидат две големи фудбалски имиња – Чави и Јирген Клоп.

Шпанската фудбалска легенда седна на клупата на Холандија со задача да внесе нова енергија во националниот тим. Чави уште на стартот покажа дека е подготвен да носи смели одлуки, а една од нив е изоставувањето на Мемфис Депај, кој во изминатиот период беше еден од најважните офанзивци на репрезентацијата.

Холанѓаните во дербито влегуваат со добра форма. Во последните 20 натпревари имаат само еден пораз во регуларниот дел, додека на домашен терен последен пат загубиле во октомври 2023 година. Сепак, во изминатиот период не недостасуваа разочарувања, а репрезентацијата не успеа да стигне до полуфиналето на Лигата на нациите во сезоната 2024/25.

На другата страна ќе биде Германија, која исто така започнува нов циклус. Јирген Клоп ја презеде репрезентацијата по разочарувачкиот настап на Светското првенство и елиминацијата уште во првата нокаут-фаза. Клоп веднаш започна со големи промени. За новиот циклус повика дури 43 фудбалери, меѓу кои и 15 кои досега немаат запишано ниту еден настап за германската репрезентација. Очигледно е дека новиот селектор сака да го прошири изборот и да пронајде нови решенија во составот.

Германија во меѓусебните дуели има подобар биланс. Германците имаат 18 победи, додека Холандија славела 12 пати. Во последните седум меѓусебни пресметки, Холанѓаните успеале да победат само еднаш. Интересно е што последните пресметки на двете селекции во Лигата на нациите донесоа доста неизвесност. Два од нивните последни четири натпревари во ова натпреварување завршија со идентичен резултат – 2:2.