Големите финални пресметки на Олимпискиот стадион во Берлин секогаш носат посебна магија, каде историјата ја пишуваат само најголемите голгетери на денешницата. Кога најтрофејниот германски клуб ќе допатува во престолнината со мотив да ја врати домашната доминација, спектаклот и врвниот фудбал се гарантирани за стотиците илјади фанови ширум светот.

Минхенски Баерн ја прекина шестгодишната пауза и успеа да го подигне трофејот во Купот на Германија. Баварците во големото финале со убедливи 3:0 го совладаа бранителот на пехарот, составот на Штутгарт, а апсолутен херој на натпреварот беше англискиот напаѓач Хари Кејн, кој со фантастичен хет-трик ја реши судбината на противникот.

Првото полувреме помина во тактичко надмудрување во кое Штутгарт имаше за нијанса поконкретни шанси, но баварската машинерија „префрли” во петта брзина по паузата. Мрежата на Александар Нибел беше начната во 55′ минута, кога по едно брзо изведено слободен удар, Мајкл Олисе перфектно центрираше од десната страна, а осамениот Кејн со прецизен удар со глава донесе водство од 1:0.

Штутгарт се обидуваше да се врати, но сите дилеми околу победникот беа решени во 80′ минута. Англискиот голгетер ја прими топката со грб кон голот на самата пенал-точка, мајсторски се ослободи од својот чувар и со одмерен удар по вторпат ја затресе мрежата. Конечниот епилог и големата прослава беа заверени во судиското продолжение, кога Кејн ладнокрвно реализираше најстрога казна, постигнувајќи го својот неверојатен 51. погодок во оваа импресивна натпреварувачка сезона. Со овој триумф Баерн ја заокружи домашната двојна круна, откако претходно суверено ја освои и Бундеслигата.