Трката за Големата награда на Барселона во Формула 1 донесе спектакуларен финиш и историски момент за италијанскиот тим. Луис Хамилтон стигна до својата прва победа зад воланот на Ферари, што воедно е негов вкупно 106-ти триумф во кариерата. Второто место на подиумот му припадна на Џорџ Расел, додека како трет заврши Ландо Норис. Во топ 10 пласман обезбедија уште и Макс Верстапен, Оскар Пјастри, Исак Хаџар, Пјер Гасли, Франко Колапинто, Лиам Лосон и Арвид Линдблад.

FIRST WIN IN RED ❤️#F1 #BarcelonaGP pic.twitter.com/6NuLXvNhm7

— Formula 1 (@F1) June 14, 2026

Иако поголемиот дел од трката во Каталонија помина сосем мирно, без поголеми инциденти и без излегување на безбедносното возило, завршницата донесе неочекуван колапс за дел од фаворитите. Во текот на целото надметнување на врвот се менуваа Расел, Хамилтон и младиот Кими Антонели. Клучниот момент се случи во 61-виот круг кога Антонели со спектакуларен маневар го претекна Расел за втората позиција и веднаш тргна во потера по водечкиот Хамилтон.

Сепак, веќе во следниот круг се случи шокантен пресврт. Болидот на талентираниот Италијанец изненадувачки забави, по што тој мораше да се паркира покрај заштитната ограда поради механички дефект во 63-тиот круг. Речиси во исто време, лошиот ден за италијанскиот тим го комплетираше и Шарл Леклер, кој исто така излета од патеката. Поради откажувањето на Антонели беше активирано виртуелно возило за безбедност, што комплетно ја промени динамиката на патеката, но искусниот Британец рутински ја сочува предноста до самиот крај.

И покрај денешното откажување, Кими Антонели останува на лидерската позиција во генералниот пласман со вкупно 156 бодови. Со денешниот голем триумф, Луис Хамилтон се зацврсти на второто место со 115 бодови, додека третопласиран е Џорџ Расел кој во моментов на своето конто има 106 бодови.