Луис Хамилтон смета дека е уникатна личност во историјата на Формула 1. Седумкратниот светски шампион не ја крие самодовербата и верува дека неговите достигнувања го издвојуваат од сите останати.

Во пресрет на Големата награда на Мексико, возачот на Ферари испрати јасна порака за своето место во спортот.

„Формула 1 никогаш немала некој како мене во своите 70 години постоење. Јас сум поинаку создаден“, изјави Британецот.

Иако има 41 година, Хамилтон не размислува за пензионирање. Напротив, посакува да настапи и на трката во Руанда во 2030 година, доколку здравјето му го дозволи тоа.

Тој ги отфрли и сомнежите дека годините влијаат врз неговите реакции зад воланот.

„Често слушав дека времето на реакција се влошува со возраста. Но, дали го видовте моето време на реакција на последната трка? Беше подобро од она на некои помлади возачи“, порача Хамилтон.

Британецот ги освои шампионските титули во 2008, 2014, 2015, 2017, 2018, 2019 и 2020 година. Со седум трофеи го дели рекордот со Михаел Шумахер.

До крајот на сезоната, Хамилтон ќе се обиде да стигне до второто место во генералниот пласман. Меѓу неговите конкуренти за таа позиција е и младиот Кими Антонели.

Очигледно, амбицијата на искусниот Британец сè уште е на највисоко ниво.