Екипата на Еурофарм Пелистер претрпе нов тежок пораз во Европската лига, откако на гостувањето кај Гумерсбах загуби со убедливи 38-28 (20-15). Со овој втор неуспех во групната фаза, битолските „зелено-бели“ остануваат на дното во групата Г и значително ги намалија шансите за премин во следната рунда.

Иако избраниците на Лино Червар одлично влегоа во мечот и рамноправно парираа во воведните 15 минути благодарение на концентрираната игра во нападот и неколкуте добри одбрани на Никола Митревски, германскиот состав брзо го фати својот ритам. Предводени од разиграниот Алекс Душебаев, домаќините ја искористија ризичната игра на Червар „седум на шест“ и со неколку постигнати голови на празна мрежа заминаа на пауза со предност од 20-15.

Во второто полувреме сликата на теренот не се промени. Бројните загубени топки и грешки во организацијата на нападот беа сурово казнети од ракометарите на Гумерсбах, кои во финишот влегоа и со двоцифрена предност за запечатување на заслужениот триумф.

Кај Пелистер најефикасен беше Филип Кузмановски со седум погодоци, додека Видомски и Ристевски додадоа по четири. Во победничкиот табор доминираше Алекс Душебаев со девет голови, а Рогановиќ заврши со шест. Двете екипи за еден месец одново ќе си ги одмерат силите, но овој пат во Битола.