Репрезентацијата на Србија доживеа тежок пораз на стартот од новата сезона во Лигата на нации, откако на домашен терен претрпе целосен пресврт од Грција и загуби со 1-2. Решавачкиот момент се случи во петтата минута од судиското продолжение, кога Дувикас со глава ја затресе мрежата и ги донесе сите три бода за гостинскиот состав.

Сè започна идеално за избраниците на Вељко Пауновиќ. Душан Тадиќ упати перфектно додавање до Андрија Живковиќ, кој рутински го отвори резултатот за рано водство на Србија. Сепак, наместо тој погодок да им даде дополнителни крила на домашните, Србите неочекувано се повлекоа во длабока дефанзива, препуштајќи им ги целосната иницијатива и поседот на топката на Грците.

Србија имаше колосална можност да го реши мечот кога Лука Јовиќ промаши чист зицер од непосредна близина. Оваа пропуштена шанса брзо дојде на наплата. По серијата одбрани на Вања Милинковиќ-Савиќ, Грција конечно го проби дефанзивниот бедем во 75. минута преку Цолис, кој по асистенцијата на Павлидис израмни на 1-1.

Завршницата донесе тотална драма. Ераковиќ со пожртвуван старт спречи брз пресврт, а Србија во финишот имаше две шанси за победа, Јовељиќ од далечина ја погоди стативата, додека ударот со глава на Лукиќ го скроти противничкиот голман. Сепак, кога сите очекуваа поделба на бодовите, следуваше студен туш во 95. минута кога Дувикас ги постави конечните 1-2, оставајќи ја Србија во исклучително тешка ситуација во борбата за опстанок во А-дивизијата.