Женската сениорска кошаркарска репрезентација на Македонија влегува во сериозна смена на генерациите. По промената на селекторската позиција, дури пет стандардни репрезентативки кои со години беа носители на играта, Анџелика Митрашиновиќ, Александра Стојановска, Мерит Хемпе, Ивана Кметовска и Илина Селцова, одлучија да го завршат својот настап за националниот тим.

Кошаркарската федерација на Македонија им упати искрена благодарност за огромниот придонес, професионализмот и жртвата во изминатите години, порачувајќи дека нивниот труд останува траен дел од историјата на домашната кошарка. Со нивното повлекување, но и поради отсуството на дел од играчите кои се во САД, селекцијата влегува во процес на радикално подмладување, па во ноемврискиот квалификациски прозорец поголема одговорност ќе падне на грбот на младите кошаркарки.