Лионел Меси вечерва ќе стави точка на својата репрезентативна кариера, но неговиот последен натпревар за Аргентина не доаѓа без контроверзии. Иако за фудбалскиот свет станува збор за историски момент, италијанскиот медиум „Газета дело Спорт“ тврди дека самиот Меси не бил особено воодушевен од идејата за ваков спектакл.

Според информациите, аргентинската фудбалска легенда наводно со голема резерва ја прифатила иницијативата за прошталниот натпревар. Причината, како што се наведува, е начинот на кој Аргентинската фудбалска асоцијација (AFA) го организирала целиот настан.

Меси сметал дека неговото име и наследството кое го остави во репрезентативниот фудбал се користат и како значаен комерцијален потенцијал. Наместо натпреварот да биде исклучиво симболично збогување со една од најголемите фигури во историјата на аргентинскиот фудбал, во неговите очи постоела опасност целиот настан да биде претворен во голем бизнис.

И покрај ваквата ситуација, Меси сепак одлучил да излезе на теренот и да го одигра последниот официјален натпревар во националниот дрес. Со тоа ќе стигне до бројката од 208 настапи за Аргентина, бројка која дополнително ја потврдува неговата историска важност за „албиселесте“.

Овој момент доаѓа по одлуката на 39-годишниот Меси да стави крај на репрезентативната кариера. Тој своето повлекување го објави по поразот од Шпанија во финалето на Светското првенство, а самата одлука ја опиша како особено тешка. По години поминати во репрезентативниот дрес, Меси сметал дека дал сè што можел за националниот тим.

Последната страница од неговата репрезентативна приказна ќе биде испишана во Буенос Аирес, каде што Аргентина ќе се соочи со Бенин. Натпреварот треба да биде свечено збогување со човекот кој со „албиселесте“ ја освои Копа Америка, Светското првенство и уште еднаш ја донесе Аргентина на врвот на светскиот фудбал.

Но, наместо само прослава на една неверојатна кариера, последниот меч на Меси отвори и прашање дали ваквиот момент навистина е организиран првенствено како чест за легендата или и како можност за дополнителна заработка од неговото име.