Новак Ѓоковиќ го дозна името на првиот противник на Мастерсот во Синсинати, каде што српскиот тениски ас ќе стартува директно од второто коло. Како трет носител на турнирот, Ѓоковиќ беше слободен во воведната рунда, а ждрепката му го донесе Аргентинецот Тијаго Агустин Тиранте, моментално 65. тенисер на АТП-листата.

Тиранте до дуелот со еден од најуспешните тенисери во историјата стигна по исклучително исцрпувачки меч. Аргентинецот помина повеќе од три часа на теренот против Јан Чоински, во натпревар кој беше исполнет со пресврти и неизвесност до последниот поен. На крајот, Тиранте славеше со 6:7(9), 7:6(7), 7:6(4). Интересно е што ниту еден сет не заврши без тај-брејк, што доволно покажува колку изедначен и физички тежок бил мечот.

Од друга страна, Ѓоковиќ ќе има предност во однос на свежината бидејќи за него ова ќе биде прв натпревар во Синсинати. Српскиот ас така ќе има можност уште на стартот да го почувствува теренот и условите, додека неговиот противник веќе има еден долг и напорен меч зад себе. За Ѓоковиќ и Тиранте ова ќе биде прва меѓусебна пресметка. Досега немаат играно еден против друг, па нивниот дуел во Синсинати ќе биде премиерен. Српскиот ас во турнирот влегува како трет носител, а вниманието повторно ќе биде насочено кон неговиот настап на американската турнеја и подготовките за завршницата на сезоната.