Новак Ѓоковиќ со победа го започна настапот на турнирот во Базел, откако по пресврт го совлада Французинот Уго Амбер со 2-1 во сетови (4-6, 6-3, 6-4). Српскиот тенисер до триумфот стигна по два часа и 29 минути игра, во меч во кој мораше да го подигне нивото по загубениот прв сет. Амбер го искористи послабиот почеток на Ѓоковиќ и со брејк во третиот гем поведе со 2-1. Французинот ја задржа предноста и со сигурна игра на свој сервис го освои првиот сет со 6-4, ставајќи го фаворитот во незгодна позиција.

Во продолжението, Ѓоковиќ заигра поагресивно и веднаш ја презеде контролата. Раниот брејк му овозможи да поведе со 3-0, по што без поголеми проблеми го приведе сетот до крај за израмнување од 1-1. Решавачкиот сет донесе најголема неизвесност. Клучниот момент се случи во петтиот гем, кога Ѓоковиќ стигна до брејк и поведе со 3-2. Амбер имаше можност веднаш да возврати, но српскиот ас го одбрани својот сервис и ја задржа предноста до конечните 6-4. Со оваа победа, Ѓоковиќ се пласираше во осминафиналето, каде што ќе се соочи со Германецот Јан-Ленард Штруф. Добриот резултат во Базел би можел да има значајна улога во неговите амбиции за настап на завршниот Мастерс во Торино.