Новак Ѓоковиќ доживеа неочекувана елиминација на Мастерсот во Синсинати, а по натпреварот откри дека веќе подолго време се соочува со здравствен проблем кој особено му создава тешкотии во услови на висока температура и влажност.

Српскиот тенисер беше елиминиран во второто коло од 14 години помладиот Аргентинец Тијаго Агустин Тиранте. По речиси три часа игра, Тиранте славеше со 2-6, 6-4, 6-4. Ѓоковиќ по мечот призна дека не се чувствувал добро на теренот и дека проблемот не бил само до условите во Синсинати.

„Не беше пријатен меч за мене. Едноставно, имам здравствен проблем кој ме мачи веќе неколку години. Имам доста проблеми, особено кога влажноста на воздухот е висока и кога е многу топло“, изјави Ѓоковиќ.

Во Синсинати температурите достигнаа околу 28 степени, но со исклучително висока влажност од околу 80 проценти. Српскиот ас вели дека бил свесен дека таквите услови можат дополнително да му ја отежнат работата.

„Знаев дека ќе биде тешко. Но, тука се и нервозата и сите останати работи кои доаѓаат со мечот. Сето тоа дополнително ја влошува ситуацијата“, додаде тој.

Особено внимание привлече неговиот одговор на прашањето дали повторно ќе настапи на турнирот во Синсинати следната година. Ѓоковиќ не ја исклучи таа можност, но призна дека во моментов не е оптимист.

„Секако дека се надевам дека ќе се вратам, но за жал, во овој момент изгледа дека се поголеми шансите тоа да не се случи. Сепак, ќе видиме што ќе донесе иднината“, порача Ѓоковиќ.

Неговите зборови веднаш отворија прашања за иднината на еден од најуспешните тенисери во историјата, иако самиот Ѓоковиќ не најави директно дека планира да стави крај на кариерата.