Новак Ѓоковиќ нема време за одмор на турнирот во Базел. По вчерашната победа над Иго Умбер, српскиот тенисер денеска не пред 18:00 часот повторно излегува на теренот, каде противник во борбата за следната фаза ќе му биде Германецот Јан-Ленард Штраф.

Ова ќе биде деветта меѓусебна пресметка меѓу 39-годишниот Београѓанин и три години помладиот Германeц, а сите претходни осум дуели му припаднаа на сопственикот на 24 Грен слем трофеи. Српскиот ас има застрашувачка доминација против Штраф, на кого му препушти само еден единствен сет во сите досегашни мечеви, серија која започна во Доха во 2017 година, а за последен пат продолжи на Ју-Ес Опен минатата сезона.

Ѓоковиќ влегува како апсолутен фаворит против ривалот кој има само една АТП титула во кариерата, под услов да го задржи фокусот и да нема здравствени тегоби. Нивниот дуел е четврти по ред на централниот терен, каде претходно ќе се одиграат пресметките Вашеро – Ходар, Микелсен – Фис и Фриц – Шаповалов.