Новак Ѓоковиќ нема да игра во четвртфиналето на турнирот во Базел, откако по голема борба и три одиграни сета загуби од Германецот Јан-Ленард Штруф со 2:1 (6:7, 7:5, 7:6). Српскиот тенисер имаше предност по првиот сет, но не успеа да го задржи ритамот, па на крајот мораше да му честита на расположениот противник.

Првиот сет мина без ниту еден брејк, бидејќи двајцата тенисери беа сигурни на свој сервис. Во тај-брејкот Ѓоковиќ покажа поголема смиреност и го доби сетот, со што се чинеше дека го презема контролата врз мечот. Сепак, Штруф не се предаде и во продолжението ја искористи својата шанса да се врати во дуелот.

Клучниот момент во вториот сет се случи при резултат 6:5 за германскиот тенисер, кога Ѓоковиќ сервираше за тај-брејк и продолжување на сетот. Наместо тоа, неколкуте сериозни грешки, меѓу кои и три двојни сервис-грешки, му овозможија на Штруф да направи брејк и да израмни на 1:1.

И во решавачкиот сет продолжи изедначената битка, без можност за поголема предност на која било од страните. Ѓоковиќ имаше можност за брејк при 4:4, но не ја реализираше, па победникот повторно мораше да биде одлучен во тај-брејк. Таму Германецот беше поуспешен и по два и пол часа игра го комплетираше големиот триумф. Она што дополнително ја одбележа елиминацијата на српскиот ас е неговата неефикасност при брејк-топките. Ѓоковиќ не успеа да искористи ниту една од шесте можности за одземање на сервисот на противникот, што на крајот се покажа како еден од пресудните фактори за поразот.