Француската фудбалска репрезентација по завршувањето на Светското првенство ќе добие нов селектор. Според информациите на познатиот новинар Фабрицио Романо, легендарниот Зинедин Зидан ќе седне на клупата на „триколорите“ и ќе го наследи Дидие Дешамп. Дешамп ќе ја напушти функцијата по 14 години, откако Франција го заврши настапот на Мундијалот со пораз од Шпанија во полуфиналето и сега ќе се бори за третото место.

За Зидан ова ќе биде прв селекторски ангажман, откако последен пат работеше како тренер на Реал Мадрид. Со „кралскиот клуб“ испиша историја, освојувајќи три последователни титули во Лигата на шампионите, две шампионски круни во Ла Лига и бројни други трофеи. Како фудбалер, Зидан е една од најголемите легенди на францускиот фудбал. Во дресот на националниот тим одигра 108 натпревари, постигна 31 гол и запиша 29 асистенции, а беше еден од најзаслужните за светската титула во 1998 година и европската круна во 2000 година.

Доколку најавите се потврдат, Зидан конечно ќе го оствари долгоочекуваниот сон и ќе ја предводи француската репрезентација во новиот циклус.