Патеката во Лас Вегас ќе биде дел од календарот на Формула 1 најмалку до 2037 година, по потпишувањето на новиот десетгодишен договор.

Оваа атрактивна ноќна трка дебитираше во шампионатот во 2023 година со победата на Макс Верстапен, кој го повтори успехот и во 2025 година, додека во меѓувреме Џорџ Расел со Мерцедес славеше во 2024 година. Заедно со трките во Мајами и Остин, ова е третиот голем настан на американско тло. Тоа дополнително го зацврстува влијанието и присуството на најбрзиот автомобилистички циркус на овој исклучително важен пазар во светот.

Спектаклот под рефлектори се вози на улична патека долга 6,2 километри која минува директно низ славниот булевар „Стрип“. Досегашните три изданија на овој настан беа комплетно распродадени и донесоа финансиски импулс од дури 3,2 милијарди долари за локалната економија во Невада. Првиот човек на Формула 1, Стефано Доменикали, изрази огромно задоволство од долгорочното продолжување на соработката, нагласувајќи дека Лас Вегас за кратко време прераснал во еден од клучните столбови на модерната ера на овој спорт. Овогодинешното издание на гламурозниот викенд е закажано за периодот од 20 до 22 ноември.