Светската куќа на фудбалот одлучи целосно да го модернизира еден од највпечатливите и најемотивните моменти пред почетокот на секој натпревар. Традиционалното интонирање на националните химни на претстојното Светско првенство ќе добие сосем нов, револуционерен формат кој ветува вистинско шоу за навивачите на стадионите и пред малите екрани.

Наместо досегашната пракса каде на теренот во линија се подредуваа само почетните 11 фудбалери, ФИФА воведува хорски и масовен пристап во кој ќе учествуваат апсолутно сите пријавени играчи, вклучувајќи ги и оние од клупата за резерви. Комплетните селекции ќе се собираат во централниот круг на игралиштето околу официјалните обележја, додека на тревникот ќе бидат раширени огромните државни знамиња, со што овој симболичен чин ќе добие далеку помоќна визуелна димензија.

Целта на организаторот е химните повеќе да не бидат само обична најава за натпреварот, туку незаменлив дел од глобалниот мундијалски спектакл поддржан со врвна ТВ-продукција. Како што првенството ќе навлегува во клучната елиминациска фаза, церемонијата дополнително ќе се збогатува и со пиротехнички ефекти, кои максимално ќе ја подигнат тензијата и емотивниот набој пред големите фудбалски битки.