Макс Ферстапен стигна до пол-позицијата за Големата награда на Сингапур по драматична завршница на квалификациите на патеката „Марина Беј“. Возачот на Ред Бул го постави најбрзиот круг со време од 1:31.373, оставајќи го зад себе Шарл Леклер за само 54 илјадити делови од секундата, додека третото место му припадна на вториот пилот на Ферари, Луис Хамилтон, со заостанување од 123 илјадити делови.

Иако Хамилтон го диктираше темпото во првите два квалификациски сегменти, одлучувачкиот удар го нанесе Ферстапен. Холанѓанецот со својот последен обид го извлече максимумот од болидот и им ги расипа плановите на „црвените“, кои сепак ќе имаат двајца претставници меѓу првите тројца. Борбата за стартните позиции започна со задоцнување од 30 минути поради лошите временски услови кои претходно го нарушија и спринтот.

Водечкиот во генералниот пласман Кими Антонели ги заврши квалификациите како четврт, пред Ландо Норис и Џорџ Расел. Меѓу десетте најбрзи се пласираа уште Оскар Пиастри, Пјер Гасли, Лиам Лосон и Арвид Линдблад. Сепак, Расел го чека преселба на самите последни позиции на стартот поради казна за замена на компоненти на погонската единица.

Кошмарни квалификации имаше вториот возач на Ред Бул, Исак Хаџар, кој поради технички проблеми беше елиминиран уште во првиот дел, а до завршната рунда не стигнаа ниту Фернандо Алонсо и Карлос Саинц. Главната трка за Големата награда на Сингапур се вози в недела, со почеток од 14:00 часот.