Скандалот околу Лос Анџелес Клиперси и Каваи Ленард доби нова, многу посериозна димензија. Министерството за правда на САД започна кривична истрага за дел од деловните аранжмани поврзани со кошаркарот, објави „Њујорк тајмс“. Истрагата е во рана фаза и засега нема обвинение, но веќе е издаден најмалку еден судски повик. Американските власти проверуваат дали спорните спонзорски договори биле само прекршување на правилата на НБА или можеби бил прекршен и американскиот закон.

НБА претходно спроведе речиси едногодишна истрага и заклучи дека Клиперси ги заобиколувале правилата за „salary cap“ со цел да му обезбедат дополнителни приходи на Ленард. Клубот беше казнет со 30 милиони долари и одземање на пет избори од првата рунда на драфтот, додека сопственикот Стив Балмер доби едногодишна суспензија. Ленард беше казнет со 700.000 долари.

Во центарот на случајот се најдоа неколку компании, меѓу кои и „Aspiration“, со која Ленард имал договор вреден 28 милиони долари. Исто така, се проверуваат и други спонзорски и деловни аранжмани поврзани со Клиперси. Клубот и Балмер ги отфрлаат наодите на НБА и најавија правна битка против санкциите. Ленард, пак, тврди дека не знаел за евентуалното заобиколување на правилата. Федералната истрага не значи дека ќе има обвинение, но случајот сега може да добие последици далеку посериозни од оние што ги изрече НБА.