По денешните натпревари од Купот на Македонија познати се уште седум патници во осминафиналната фаза. Брегалница не дозволи никакво изненадување и со убедливи 4:1 славеше против Тетекс. Иако тетовчани поведоа преку Никола Ристевски, штипјани направија комплетен пресврт благодарение на головите на Филип Алексовски, Даријан Тасев и Нејтаниел Маско, како и автоголот на Мартин Јованоски.

Сигурен настап имаше и Шкендија Арачиново, која со 3:1 го совлада Детонит Плачковица со погодоците на Дашмир Елези, Марко Симоновски и Бесир Демири. Вистинска демонстрација на сила приреди Башкими, кој со убедливи 5:0 го савлада тимот на Коњари. Голеадата започна со автоголот на Бурим Алиев, а потоа мрежата ја тресеа и Теодор Мирчевски, Џулијан Капланај, Страфа Андри и Стефан Ристовски.

Најдраматично беше во пресметката меѓу Новаци и ГФК Охрид, каде што домаќините стигнаа до победа од 1:0 и пласман понатаму со доцниот гол на Јованчо Трајкоски. Струмичка Беласица славеше на гостувањето кај Осогово со 1:3 со головите на Елмаз Емуш, Благој Стојанов и Рон Мемеди, додека почесниот погодок за домашните го постигна Даријан Трајчов.

Пласман во следната рунда обезбеди и екипата на Скопје, која со голот на Виктор Ангелов го совлада Кожуф со 1:0, како и Каменица Саса која со идентични 1:0 го елиминираше Шкупи со погодокот на Драган Паунов. За комплетирање на осминафиналната двојка преостанува да се одиграат уште три меча, а силите ќе ги одмерат Могила – Арсими, Крошу Спорт – Тиквеш и Вардар Неготино – Работнички.