Новото американско засилување на МЗТ Скопје, Ноа Фарахан, полека се навикнува на новата средина и веќе ги одработува првите тренинзи со македонскиот шампион. 25-годишниот бек е меѓу играчите од кои се очекува да имаат значајна улога во сезоната во која „сино-белите“ ќе се натпреваруваат на три фронта. Фарахан позитивно зборува за првите денови во Скопје, особено за приемот што го добил од клубот и луѓето во Аеродром. Според него, атмосферата во тимот е одлична, а играчите веќе покажуваат голема енергија и желба за работа.

Американецот е задоволен и од начинот на кој функционира екипата на теренот. Брзата игра и доброто движење на топката му даваат причина за оптимизам пред стартот на сезоната, во која МЗТ ќе има обврски во домашното првенство, АБА2 лигата и ФИБА Еврокупот. Токму европските натпревари се еден од најголемите мотиви за Фарахан, кој не се плаши од одговорноста што му ја носи улогата во тимот. Американскиот бек отворено порача дека е подготвен да преземе лидерска улога и да помогне МЗТ да направи големи резултати.

Првиот официјален натпревар за македонскиот шампион ќе биде на 26 септември, кога МЗТ Скопје ќе се соочи со Куманово во Суперкупот.