Формула 1 шампионатот ќе ја дочека својата завршница точно според предвидениот календар, откако раководството на најбрзиот циркус во светот официјално потврди дека трките во Катар и Абу Даби ќе се одржат без никакви промени.

Иако во изминатиот период се појавија сериозни шпекулации за евентуално откажување на овие две блискоисточни етапи поради геополитичките тензии меѓу САД и Иран што го зафатија тој регион, деталните безбедносни проценки покажаа дека нема ризик за екипите и возачите. Првиот човек на Формула 1, Стефано Доменикали, ги демантираше сите гласини и ги потврди сигурните гаранции:

„Трки во Доха и Абу Даби ќе има. Ова е нашиот дефинитивен заклучок донесен врз основа на сите официјални информации и заштитни гаранции со кои располагаме.“

Според утврдениот распоред, трката за Големата награда на Катар на патеката во Доха е закажана за 29 ноември, додека големото финале на сезоната во Абу Даби ќе се вози на 6 декември.