Канада испишува нови, златни страници во својата спортска историја. На својот дури трет мундијалски настап во историјата, селекцијата успеа да го направи најголемиот исчекор и на домашен терен прва да обезбеди виза за големото осминафинале на Светското првенство. Самиот натпревар против Јужна Африка брзо ќе биде заборавен поради затворената игра, но историскиот погодок на Стивен Еустакио дефинитивно влегува во мундијалските анали.

Фудбалерот го доживеа врвот на својата кариера токму на теренот во Лос Анџелес, градот каде што ги брани и клупските бои. По големиот триумф, тој емотивно го опиша моментот кој донесе невидено славје за канадскиот народ, потенцирајќи дека тимот ниту во еден момент не престанал да верува во победа.

„Работевме пеколно за ова и сакавме да им подариме историја на сите Канаѓани. Кога упатив удар кон голот, имав чувство како целата екипа да шутира заедно со мене. Како сите да дадоа дел од својата сила за таа топка да заврши во мрежата. Пресреќен сум“, изјави егзалтираниот Еустакио.

Со реално покриен оптимизам, Канаѓаните сега мирно го чекаат својот следен противник од мега-пресметката меѓу Холандија и Мароко. Херојот на „јаворовиот лист“ испрати и директно предупредување до идниот ривал во топ 16 фазата. Тој вети дека кој и да се падне во осминафиналето, ќе го одигра дефинитивно најтешкиот натпревар на овој шампионат бидејќи Канада е максимално подготвена за нова фудбалска битка.