Лацио го врза Романо Флориани Мусолини до 2031 година. Римскиот клуб официјално потврди дека постигнал договор за продолжување на соработката со 23-годишниот дефанзивец, кој постепено се наметнува како дел од првиот тим.

За младиот фудбалер ова претставува значаен чекор во кариерата, но и потврда за довербата што ја има од клубот во кој ги направи првите фудбалски чекори. Мусолини е производ на младинската академија на Лацио, а во сениорскиот состав беше приклучен во 2021 година. Во меѓувреме, за да стекне натпреварувачко искуство, настапуваше како позајмен играч во Пескара, Јуве Стабија и Кремонезе.

Во актуелната сезона 2026/27, дефанзивецот добива поголема улога во тимот, забележувајќи 11 настапи во Серија А и постигнувајќи еден погодок. По потпишувањето на новиот договор, Мусолини не го криеше задоволството од продолжувањето на авантурата со римскиот клуб.

„Продолжувањето на договорот со овие бои е извор на огромна гордост за мене. Тоа претставува дополнителна мотивација секогаш да го давам најдоброто од себе. Напред, Лацио!“, порача фудбалерот.

Мусолини е правнук на Бенито Мусолини, поранешниот италијански диктатор, поради што неговото презиме често привлекува внимание и надвор од фудбалските терени.