Спортскиот директор на Баерн Минхен, Макс Еберл, за првпат отворено говореше за процесот зад ангажманот на Мајкл Олисе, кој пред две години пристигна од Кристал Палас за 53 милиони евра, сума која денес делува исклучително скромно со оглед на неговите фантастични партии и огромното влијание врз играта на тимот.

Еберл откри дека клучна улога во скаутингот имале информациите од тогашниот менаџер на Кристал Палас, Оливер Гласнер, кој е близок пријател со спортскиот директор на баварците, Кристоф Фројнд. Наместо лесно да го препорача, Гласнер категорично истакал дека Олисе сè уште учи и му е неопходен на тимот, што за Баерн било дециден сигнал за неговата вистинска вредност.

„Со Мајкл е вистинско уживање да се разговара за фудбал. Искрено, знаевме дека потпишуваме со многу добро крило, типично за квалитетите на Баерн, но дека ќе биде толку брилијантен… Сумата беше предвидлива поради откупната клаузула, а неговиот експлозивен развој е голема заслуга и на одличната средина во екипата“, истакна Еберл.