Српскиот напаѓач Душан Влаховиќ нема да ја продолжи соработката со Јувентус и ќе ги напушти редовите на торинскиот гигант по завршувањето на актуелната сезона. Добро упатениот италијански новинар и инсајдер за трансфери, Николо Скира, потврди дека последниот обид за пронаоѓање заеднички јазик меѓу двете страни завршил без успех.

Главната пречка за обновување на договорот биле финансиските барања на фудбалерот. Влаховиќ побарал зголемување на досегашната плата за 30 проценти, сума која раководството на „старата дама“ одбило да ја плати поради актуелната економска политика на клубот. Бидејќи ниту една од страните не покажала подготвеност за компромис, српскиот голгетер во летниот преоден рок ќе биде слободен агент и ќе може да избере нова средина без обесштетување.