Лука Дончиќ не доби ниту еден глас во традиционалната предсезонска анкета на генералните менаџери на НБА-клубовите за најкорисен играч во претстојната сезона. Иако зад себе има импресивна сезона, словенечкиот кошаркар не се најде меѓу фаворитите според ова гласање.

Најголема поддршка доби Виктор Вембањама со 77 проценти од гласовите, додека Никола Јокиќ заврши на второто место со 10 проценти. Ентони Едвардс освои седум проценти, а гласови добија и Шеј Гилџес-Александер и Џејсон Тејтум. Тренерот на Лос Анџелес Лејкерс, Џеј-Џеј Редик, не сакаше да ја коментира позицијата на својот најголем ас, потенцирајќи дека е рано да се зборува за индивидуалните признанија.

„Се држам до истото правило што го имав додека работев во медиумите. Не сакам да зборувам за МВП-наградата додека не поминат најмалку 50 натпревари“, изјави Редик.

Сепак, Дончиќ доби признание во друга категорија, откако со 37 проценти од гласовите беше избран за најдобро ниско крило во лигата. Минатата сезона Словенецот беше најдобар стрелец во НБА со просек од 33,5 поени, 7,7 скока и 8,3 асистенции на 64 натпревари за Лејкерс. Сезоната ја заврши на четвртото место во трката за МВП, зад Гилџес-Александер, Јокиќ и Вембањама, а проблемите со повредата на задната ложа дополнително влијаеја врз неговиот финиш.

Лејкерс новата сезона ја започнуваат на 21 октомври против Голден Стејт, кога Дончиќ ќе има можност на теренот да покаже зошто повторно треба да биде меѓу главните кандидати за највисоките индивидуални признанија.